"Сібір для беларусаў - асаблівы рэгіён, дзе яшчэ з кацярынінскіх часоў і царскіх рэформ Сталыпіна жыве вельмі шмат нашых землякоў, якія сваім розумам і сэрцам прыкіпелі да гэтай зямлі, праславілі яе, зрабіўшы багацейшай і прыгажэйшай. Таму нам і цікава ўсё, што ў вас адбываецца", - сказаў у пачатку сустрэчы Прэзідэнт. Ён таксама адзначыў, што ў Беларусі з вялікай цікавасцю сачылі за нядаўнімі выбарамі ў рэгіёнах Расіі, і павіншаваў Андрэя Траўнікава з пераканаўчай перамогай. 

Кіраўнік дзяржавы выказаў упэўненасць, што візіт губернатара Новасібірскай вобласці ў Беларусь адкрые новую старонку ў супрацоўніцтве беларускіх і расійскіх рэгіёнаў. "А магчымасці тут, як вы самі пераканаецеся, бліжэй пазнаўшы нашу краіну, вялізныя", - заявіў беларускі лідар.

Прэзідэнт звярнуў увагу на існуючыя сур'ёзныя асновы для далейшага росту: "Аб'ём гандлёвых аперацый у мінулым годзе склаў амаль паўмільярда долараў. Лічба значная, але трэба разабрацца, чаму сёння мы прыкметна адстаём ад мінулагодніх паказчыкаў. Мне дакладваюць нашы спецыялісты, адказваючы на гэта пытанне, што спад абумоўлены перш за ўсё скарачэннем вашых паставак па такіх пазіцыях, як насенне рапсу, электрарухавікі, каменны вугаль, іншыя. Я прапаную сумесна папрацаваць над тым, каб збалансаваць наш гандаль. Напрамкаў і магчымасцей для ўзаемавыгаднага супрацоўніцтва дастаткова".

Супрацоўніцтва з Новасібірскам цяпер грунтуецца галоўным чынам на пастаўках сельскагаспадарчай і кар'ернай тэхнікі, канстатаваў Прэзідэнт.

"Але мы ж ведаем, што поле дзейнасці на гэтым напрамку значна шырэйшае. У нас ёсць магчымасць дапамагчы вам вырашыць праблемы з абнаўленнем парку пасажырскага транспарту і іншай тэхнікі", - адзначыў Аляксандр Лукашэнка. Добрым прыкладам такой вытворчай кааперацыі ён назваў мадэрнізацыю трамваяў на магутнасцях, створаных "Белкамунмашам" у Новасібірскай вобласці.

А паколькі Новасібірск, па сутнасці, з'яўляецца адміністрацыйным цэнтрам Сібіры, праект, як лічыць беларускі лідар, для ўзаемнай выгады можна і трэба маштабіраваць з улікам патрэбнасцей іншых рэгіёнаў.

У сувязі з гэтым Прэзідэнт даручыў Ураду звярнуць увагу на тое, каб у сумесным органе, які займаецца развіццём гандлёва-эканамічнага супрацоўніцтва Беларусі з Новасібірскай вобласцю, наша краіна была прадстаўлена службовай асобай высокага ўзроўню. 
 
Як растлумачыў Кіраўнік дзяржавы, Беларусь цяпер узяла курс на структураванне сваіх магчымасцей у Расіі. "Сёння попыт на Беларусь вялікі, але мы ж самі не вельмі вялікія. Таму нам трэба дакладна разабрацца, дзе будуць цэнтры, праз якія мы будзем працаваць з Расійскай Федэрацыяй", - сказаў Аляксандр Лукашэнка. Адзін з такіх цэнтраў будзе размешчаны, напрыклад, у Новасібірску, улічваючы геаграфічнае становішча і значнасць гэтага рэгіёна. "Без Новасібірска няма палавіны Расіі, прынамсі, за Уралам. Таму тут павінны быць сканцэнтраваны нашы інтарэсы не толькі ў новасібірскім напрамку, але і ва ўсім Сібірскім рэгіёне. Мы ў бліжэйшы час ва Урадзе прымем такое рашэнне і будзем вельмі сур'ёзна развіваць на базе Новасібірска (я ведаю, вы гэта падтрымліваеце) цэнтр кампетэнцый і цэнтр гандлю на вялізнай прасторы Расійскай Федэрацыі", - дадаў Прэзідэнт.

Традыцыйна значную частку беларускага экспарту ў расійскі рэгіён складаюць харчовыя тавары і сельскагаспадарчая сыравіна. "Упэўнены, што, узаемадзейнічаючы ў сферы аграпрамысловага комплексу - ад будаўніцтва ў вёсцы да біятэхналогій, мы зможам зрабіць намнога больш, чым робім цяпер, - падкрэсліў Прэзідэнт. - Гэтак жа, як у навуцы і адукацыі. Паколькі невыпадкова Новасібірск, у якім даўно і паспяхова працуюць аддзяленне Расійскай акадэміі навук і сумарна амаль сотня інстытутаў, даследчых цэнтраў і ВНУ, неафіцыйна называюць навуковай і студэнцкай сталіцай Сібіры".

Сувязі паміж вучонымі Беларусі і расійскага рэгіёна ніколі не перапыняліся, ёсць узаемадзеянне, планы і праекты, але гэта ўсё, на думку Прэзідэнта, трэба паскараць і напаўняць канкрэтыкай, патрабуюцца больш актыўныя дзеянні ў тым ліку з беларускага боку. "Напрыклад, можам аб'яднаць нашы намаганні ў перспектыўных, вельмі важных новых напрамках (сферах. - Заўвага) - штучнага інтэлекту і беспілотных авіяцыйных сістэм з улікам задач па імпартазамяшчэнні і забеспячэнні тэхналагічнага суверэнітэту з прыцэлам на апераджальнае развіццё", - прапанаваў Кіраўнік дзяржавы. 

У частцы гуманітарнага і культурнага супрацоўніцтва Аляксандр Лукашэнка выказаў удзячнасць кіраўніку расійскага рэгіёна за выступленне Сібірскага рускага народнага хору ў Мінску. "Беларусы любяць і ведаюць гэты калектыў, любяць яркія, таленавітыя выступленні і заўсёды вельмі рады гасцям", - заўважыў Прэзідэнт. У сваю чаргу ён даручыў сур'ёзна паставіцца да арганізацыі і правядзення Дзён Беларусі ў Новасібірскай вобласці восенню 2024 года. А Дні культуры Новасібірскай вобласці ў Беларусі пройдуць вясной будучага года.

"У нас ёсць усе магчымасці значна прымножыць паказчыкі гандлю і ўмацаваць сувязі ў навукова-адукацыйнай, гуманітарнай і іншых сферах, - падкрэсліў беларускі лідар. - Я гарантую вам, што ўсе нашы дамоўленасці будуць безумоўна выкананы, прытым якасна і ў тэрмін".

"Адзінства дзвюх дзяржаў - гэта перш за ўсё эканоміка. Менавіта так мы бачым гэта з Беларусі. Калі будзе такі ж рух, як цяпер, у эканоміцы, калі будуць такія добрыя адносіны ў нас з Расіяй, як са многімі рэгіёнамі, у тым ліку з вашым, паверце, не трэба ніякай агітацыі", - падкрэсліў Кіраўнік дзяржавы.

Дзве краіны маюць усё неабходнае для таго, каб выбудоўваць адносіны, канстатаваў беларускі лідар. За доўгі перыяд супрацоўніцтва яны ўжо зразумелі, прааналізавалі свае памылкі, недахопы і цяпер разам рухаюцца наперад у правільным напрамку.

"У першыя дні санкцыйнага націску на нас я заўсёды гаварыў, знаходзячыся ў Расіі і на вялікіх форумах: мы з гэтай сітуацыі выйдзем, нам трэба крыху часу", - адзначыў Прэзідэнт.

Праз паўтара-два гады з часу ўвядзення санкцый словы Аляксандра Лукашэнкі пацвярджаюцца на практыцы. Таму цяпер трэба далей па тым жа шляху актывізацыі ўзаемадзеяння ісці, выкараняючы недахопы і недапрацоўкі, дапушчаныя на першапачатковым этапе. "Дзякуй богу, што мы адзінства сваё захавалі", - падкрэсліў Прэзідэнт, характарызуючы ўзаемаадносіны Беларусі і Расіі.

Кіраўнік дзяржавы расказаў, што ў сваіх апошніх дакладах спецслужбы і разведка папярэджваюць аб планах Захаду раз'яднаць Беларусь і Расію.

"Цытаты службовых асоб адтуль: "Спакойна не будзе". Яны жывуць ужо і бачаць (яшчэ не вылезлі з Украіны), што трэба рассекчы адзінства Беларусі і Расіі. Пры тым усе на Захадзе, нават тыя краіны, якім, здавалася б, усё роўна, што адбываецца тут у Беларусі і Расіі, паміж намі. Недзе бізуном, недзе пернікам, недзе падсаладзіць нешта, адкалоць чыноўнікаў, раскалоць, адарваць ад Прэзідэнта - старыя метады. Усе гэтыя заявы вераснем-кастрычнікам датаваны. Таму спакойна не будзе. Трэба нацэліцца на тое, што нам трэба рабіць сваё", - падкрэсліў Кіраўнік дзяржавы.

Беларусь і Расія ў гэтай няпростай сітуацыі абапіраюцца на дружалюбныя краіны. Але Аляксандр Лукашэнка адзначыў, што ў іх таксама ёсць свае інтарэсы. "Таму давайце рабіць сваю айчыну, абараняць яе, - заклікаў беларускі лідар. - У нас толькі гэты шлях, іншага няма. І мы можам выглядаць прыстойна. За пяць гадоў мы забудзем тое, што адбываецца цяпер".

"Усё мы вернем. Нават тое, што страцілі. Нават не сумнявайцеся", - заявіў Прэзідэнт.

А ў адносінах да тых замежных кампаній, якія пад уздзеяннем санкцый вырашылі пакінуць беларускі і расійскі рынкі, Аляксандр Лукашэнка выказаўся коратка: "Пайшлі - да пабачэння".

"Я заўсёды, усе свае гады, колькі я працую, Расію заклікаў да таго, што нам трэба сваё, сваё, сваё, - прадоўжыў ён. - Не трэба ад нафты і газу долары пераводзіць у нейкую, прабачце, жратву або гайкі і балты. Мы самі гэта ўмелі рабіць". Кіраўнік дзяржавы звярнуў увагу, што для Расіі і Беларусі пры развіцці кааперацыі важна не дапусціць дубліравання вытворчасцей. 

"Я рады, што ў Расіі нарэшце ацанілі магчымасці Беларусі, таму што практычна ні адно буйное, сярэдняе прадпрыемства ў нас не развалілася, не загінула. У асноўным (можа, гэта не падабаецца расіянам) яны дзяржаўныя, працуюць нядрэнна, кіруемыя, прынамсі. І сёння ідзе магутная кааперацыя (з расійскім бокам. - Заўвага). Нам толькі нельга дапусціць цяпер (грошай лішніх няма) дубліравання вытворчасці. Тое, што ёсць у нас, будзе заўсёды працаваць на расійскім рынку. Тое, што ёсць у вас, мы заўсёды, калі такая патрэбнасць ёсць і будзе, купім. Таму нельга дапусціць дубліравання", - падкрэсліў Прэзідэнт.

Аляксандр Лукашэнка адзначыў, што Беларусь цяпер вельмі актыўна развівае адносіны з краінамі далёкай дугі, у тым ліку Афрыканскага кантынента. У сувязі з гэтым ён прапанаваў кіраўніку расійскага рэгіёна разам выходзіць на рынкі гэтых дзяржаў.

"Там попыт на нас вялікі. На апошняй сустрэчы з Прэзідэнтам Расіі мы падрабязна абмяркоўвалі гэта пытанне. Савецкі Саюз, як гавораць нашы спецыялісты, дапусцім, па Афрыцы, у свой час зрабіў вялізны зачын, стварыў вялізны фундамент і базу для цяперашняга супрацоўніцтва постсавецкіх рэспублік - і перш за ўсё Беларусі і Расіі - на тым кантыненце. Яны нам давяраюць больш, чым каму-небудзь. Нам трэба гэтым скарыстацца. Пашыраючы свае інтарэсы, падтрымліваць развіццё і афрыканскіх, і азіяцкіх краін, якія нас там чакаюць даўно. Нам трэба разам тут папрацаваць", - падкрэсліў Прэзідэнт.

Пры гэтым Аляксандр Лукашэнка звярнуў увагу, што Расія ў цэлым і сама добра працуе ў гэтых краінах, але што датычыцца яе рэгіёнаў, то Беларусь магла б разам з імі ствараць сумесную прадукцыю і пастаўляць яе ў дзяржавы далёкай дугі або дапамагаць расійскім рэгіёнам у пастаўках. "Гэтыя рынкі, безумоўна, з'яўляюцца перспектыўнымі. Для нас час магчымасцей", - перакананы беларускі лідар. 

Прэс-служба Прэзідэнта Рэспублікі Беларусь