Прэзідэнт Беларусі Аляксандр Лукашэнка 9 красавіка наведаў трэніроўку хакейнага клуба "Дынама-Мінск" у "Мінск-Арэне". 

09.04.2025г. Прэс-служба Прэзідэнта Рэспублікі Беларусь

Хакеісты мінскага "Дынама" ўпершыню ў гісторыі клуба прабіліся ў другі раўнд плэй-оф Кантынентальнай хакейнай лігі. У першым раўндзе сапернікамі "зуброў" былі хакеісты маскоўскага ЦСКА. "Дынама" выйграла ў ЦСКА ўсе тры матчы ў Мінску і адзін - у Маскве. З улікам двух паражэнняў на арэне саперніка нашы хакеісты атрымалі перамогу ў серыі з лікам 4:2.

Гульню нашых хакеістаў ацаніў і Прэзідэнт. Аляксандр Лукашэнка прыехаў на трэніроўку "Дынама-Мінск", каб падтрымаць каманду і, вядома, пагутарыць са спартсменамі.

Хакеісты размаўлялі з Прэзідэнтам адразу на лёдзе. Кіраўнік дзяржавы падзякаваў "зубрам", якія падарылі беларусам сапраўднае спартыўнае свята. Выхад хакеістаў сталічнага "Дынама" ў 1/4 фіналу Кубка Гагарына - падзея, можна сказаць, гістарычная. Сам Прэзідэнт таксама сачыў за поспехамі "Дынама-Мінск". Аляксандр Лукашэнка прызнаўся, што абмяркоўваў хакей і са сваім расійскім калегам Уладзімірам Пуціным.

Адным з самых відовішчных матчаў Прэзідэнт назваў нядаўнюю гульню "Дынама-Мінск" у Маскве супраць ЦСКА.

У чвэрцьфінале КХЛ "Дынама-Мінск" згуляе з чэлябінскім "Трактарам". Першыя два матчы "зубры" правядуць на выездзе ў Чэлябінску 12 і 14 красавіка.

"Я паглядзеў гульні "Трактара" - адзін у адзін ваша гульня: хуткая, часам без аглядкі", - падзяліўся меркаваннем аб гульні будучага саперніка "Дынама-Мінск" Прэзідэнт і назваў "Трактар" камандай, з якой "можна гуляць".

Аляксандр Лукашэнка заўважыў, што сібіракі - гэта нашы людзі, і дадаў, што ў свой час у Сібір саслалі многіх беларусаў. "Яны там Сібір стваралі, паў-Расіі. Таму гэта нашы людзі, беларускія. Але спорт ёсць спорт", - дадаў Кіраўнік дзяржавы.

Пасля размовы з хакеістамі Прэзідэнт правёў імправізаваную дуэль з варатаром "Дынама-Мінска" Васілём Дземчанкам, якому закінуў некалькі шайбаў. А пасля размінкі паназіраў за трэніроўкай хакеістаў і даў ім некалькі парад.

Прэс-служба Прэзідэнта Рэспублікі Беларусь